“Staan dan
stil, en draai terug! Terug na u volk; terug na u volk se hoogste ideale; terug
na de pand wat ook aan u toevertrou is om te bewaar; terug na die volksaltaar
waarop u u offers moet lê, en as dit geëis word ook uself as ’n offerande;
terug na die heiligheid en die onskendbaarheid van die gesinslewe; terug na u
Christelike wandel; terug na u Christelike geloof; terug na u Kerk; terug na u
God!”
[D.F. MALAN,
INWYDING VAN DIE VOORTREKKERMONUMENT OP 16 DESEMBER 1949]
DIE LIB-ERA
As kind is ek
die Christelike vrugte van die gees geleer, te wete liefde, blydskap, vrede,
lankmoedigheid, sagmoedigheid, goedheid, getrouheid, vriendelikheid en
selfbeheersing en dis goed en mooi, maar ek is ook die waarde geleer van
regverdigheid, opregtheid, betroubaarheid, idealisme, deursettingsvermoe en
dapperheid en hierdie laasgenoemdes was vir my ewe belangrik en ek het ewe veel
daarin geglo as in eersgenoemdes.
So is ek ook die waarde van die gesin, die volk, vryheid,
soewereiniteit en onafhanklikheid geleer en ek het dit as dood natuurlik
aanvaar.
Ek sien vandag in die lewe rondom my bloedweinig oor van
die Christelike vrugte van die gees.
Die begrippe in die tweede groep het in onbruik verval en nasionale
vryheid, soewereiniteit en onafhanklikheid het skeldwoorde geword.
Daar bestaan 'n ligsinnige, populêre
uitdrukking, te wete dat die enigste les wat uit die geskiedenis geleer word,
is dat daar geen les uit die geskiedenis geleer word nie. Die enigste mense wat
nie 'n les uit die geskiedenis leer nie, is diegene wat die geskiedenis nie ken
nie of nie 'n les uit die geskiedednis wil leer nie of wat alles wat in
geskiedenisboeke staan goedsmoeds op sigwaarde aanvaar en vir soetkoek opeet.
Dit is onder andere die geval omdat
ons in die LIB-era: die EL-IE-BEE-era of -tydsgewrig lewe. Die LIB is 'n letterwoord
vir LEUENS, ILLUSIE en BEDROG, overgezet
synde: MULTIKUL. Die toestand word nou egter akuut as gevolg van die
oppermagtigheid van die media en die blatantheid, vermetelheid, agressie en
overdunde haat waarmee dit bedryf word! Ook bekend as verdraagsaamheid.
“D-DAY”
Op die strande
van Normandië
het die
afgelope dae
'n skouspel of spektakel
sig sonder keer voltrek
die leiers van
die geallieerdes
het met pomp and circumstance
die bevryding van die vasteland
in 1944 herdenk
die vyand van
die verlede
is die bondgenoot van die hede
hou die gewone man tevrede
want vir ons gaan dit om mag en geld!
Rondom 6 Junie 1994 kon ons 'n LIB-orgie van letterlik
wêreldformaat gadeslaan. Dit het 'n mens onwillekeurig laat dink aan die
opskrif in 'n Engelse koerant : "FOG IN CHANNEL, CONTINENT CUT OFF."
(MIS IN ENGELSE KANAAL, VASTELAND AFGESNY.)
Almal het deelgeneem - al die
bondgenote en meer - die bonte massa van die New Age, van die LIB-era ..... maar waar
was die groot bondgenoot in die Europese Unie, in NAVO, in die Wes Europese Unie, in die Eurokorps? Swyg tog, swyg
tog! Ons vereniging strek nie tot die strande van Normandië nie, ons hervat dit
eers weer op die strande van Korfu, waar ons die bruikbare idioot, die
wetenskaplike, tegnologiese en ekonomiese reus van ons kontinent met sy
verstand van 'n kleuter verder kan manipuleer.
Gaan die Duitsers ooit wakker word? Wanneer wil die ander
gewone Europeers en die Vlaminge tog ontwaak?
Die gewone man van Europa moet besef dat die Slag der
Gulden Sporen op die Groeningekouter slegs 'n klein oorwinning was in 'n
deurlopende stryd om vryheid en ten spyte van die Renaissance geld Voltaire se
woorde dat die mens vry gebore word, maar hom oral in kettings bevind, vandag
meer as ooit.
DIE TOTALE
AANSLAG
Dit was dan
ook een van die groot sondes van die Afrikaner-Boerevolk; nie apartheid of
rassisme of die onderdrukking van die swartes nie, maar: "Dat vrije Volk
zijn wij. Dat vrije volk, dat vrije volk, dat vrije, vrije volk zijn wij!"
in die woorde van die Transvaalse Volkslied en Die Stem: ....."teen die hele
wereld vry ....." en dit kon nie geduld word nie. Die vrye volk moes weer
onder die hiel gebring word. Die totale aanslag wat van die ontstaan van my
volk teen hom gevoer is, is volgehou. Ongeveer 'n eeu gelede het die magtige
Britse Ryk nie minder nie as 'n halfmiljoen soldate gemonster om my yolk van
die aangesig van die aarde uit te wis - en toe was daar tog nog nie apartheid
nie. Ons mog egter nie vry wees nie - geen gewone mens mag vry wees nie, ook
nie u nie.
Vandaar die
Groot Bevryding van Europa van 6 Junie 1944 - dit was die begin van die
grootste kolonisasieaksie in die geskiedenis van die Britse Empire, maar om
deur die Britte bevry te word, is soos 'n omhelsing deur die dood
Die (Afrikaner-)Boerevolk het die groot
fout gemaak om die misleiding te glo dat dit wat ons op die slagveld van die
Tweede Vryheidsoorlog verloor het, ons op 'n demokraties- politieke wyse kon
terugkry - ja, ons het geglo in die demokrasie, die illusie van die demokrasie,
maar nou het die seepbel gebars en sit ons met leë hande. In Suid-Afrika
verloop die lewe vandag blykbaar heel normaal en soos tevore: my mense braai
steeds vleis, speel nog rugby en die son skyn steeds, maar: ons het nie meer
ons eie vlag nie, ons is ons land kwyt en die ergste van alles is dat ons
sonder eer is, want al het ons alles in die Tweede Vryheidsoorlog verloor,
het ons met eer uit die stryd getree, maar nou ..... eerloos, eerloos .....
..... of die (Afrikaner-)Boerevolk ooit weer sy
onafhanklike, soewereine volkskap in 'n eie vaderland sal herwin, die weet ek
nie - ek kry die indruk dat die tyd kort raak en die leuens, illusie en bedrog neem
slegs toe .....
..... of die Duitsers ooit weer hul selfrespek en eer sal
terugkry - op 'n politieke wyse? Nooit.
..... of die Vlaming ooit soewereiniteit en selfbeskikking in 'n onafhanklike
Vlaanderen in 'n Europa van volkere sal verkry? Slegs as u die totale aanslag
begin beveg en die enigste manier om dit te doen is met kennis.
Kennis deur navorsing, hersiening van die geskiedenis,
skryf en publikasie van sodanige inliting so snel en so wyd as moontlik.
In Suid-Afrika was ons altyd bekommerd oor wat die
buiteland van ons dink en een van die belangrikste regeringswerksaamhede was om
inligting oor Suid-Afrika in die buiteland te versprei - dit was 'n fout. Ons
moes ons eie mense eerder ingelig het oor wat in die buiteland aangaan: dat die
Vlaminge volksoewereiniteit nastreef, die Skotte, die Wallisers, die Baske, die
Koerde, nie eers gepraat van die volkere in die voormalige Oosblok nie.
EK STERWE
LIEWER WAARDIG AS WAT EK ONWAARDIG LEWE
Ek het reeds in Suid-Afrika gepleit vir die oprigting van
'n navorsingsentrum wat sigself uitsluitlik bemoei met navorsing en die
daaropvolgende verspreiding van inligting oor ons stryd om vryheid; ons stryd
om bevryding van die onderdrukking van die koningshuise en hul lakeie.
Die tyd is
meer as ryp dat so 'n sentrum opgerig word en waarom nie in Vlaanderen nie?
So 'n sentrum kan eweneens dien as die administratiewe
setel van 'n druk- of lobbygroep om weer 'n Boerestaat in Suider-Afrika tot
stand te bring. Ons kan nou reeds begin beplan aan aksies vir die toekoms. Ek
is daarvan bewus dat Suid-Afrika binnekort 'n nuwe ambassadeur in België moet
aanstel – waarom sy aanstelling ongesiens laat verbygaan?
Ons moet praktiese en uitvoerbare
doelwitte identifiseer, want dit gee vir ons iets nuttigs om voor te lewe en selfs te sterwe.
..... want die lewe is of werd om voor te sterwe,
..... of dit is nie die moeite werd nie.
As u dan vir my vra of dit nog sin het, kan ek u slegs antwoord :
“..... al dreigen zij zijn vrijheid met kluisters en
geschreeuw.
Zij zullen hem niet temmen, zolang één Vlaming
leeft .....”
Ek voel in my
bloed
in my hart en
niere die gloed
van die
Boeregees brand
waar, o waar, is my eie, vrye land .....
